Nun principio pensouse en Amado Alonso como único enquisador para o Atlas Lingüístico de la Península Ibérica, pero despois as circunstancias aconsellaron acudir a varios enquisadores adestrados por Navarro Tomás na metodoloxía do traballo de campo. Desde o primeiro momento descartouse a enquisa por correspondencia e insistiuse na necesidade de facer enquisas in situ, e de utilizar a transcrición fonética.
La investigación del ALPI se realizaría directa y personalmente por encuestadores especialmente preparados para efectuar la tarea con estricta uniformidad metódica. Se formarían tres equipos, uno por cada una de las tres zonas lingüísticas peninsulares: castellana, gallego-portuguesa y catalano-valenciana. Cada equipo estaría formado por dos jóvenes nativos de la zona.
(Navarro Tomás 1975: 10)
O primeiro equipo de enquisadores estivo composto por Aurelio M. Espinosa fillo, Rodrigo de Sá Nogueira, Lorenzo Rodríguez-Castellano, Manuel Sanchis Guarner, Aníbal Otero, Francisco de B. Moll e Armando Nobre de Gusmão.
No comezo, encargáronse da zona castelá Aurelio M. Espinosa, Jr., "de familia novo-mexicana de clase universitaria", e Lorenzo Rodríguez-Castellano, asturiano; da zona catalano-valenciana, Manuel Sanchis Guarner, valenciano, e Francisco de B. Moll, menorquino; e da zona galego-portuguesa, Aníbal Otero, galego, e Rodrigo de Sá Nogueira, portugués, substituído despois por Armando Nobre de Gusmão.
|
|
|
|
|
|
|
|
|
|
Cando no verán de 1936 se interromperon os traballos, estaban acabadas as enquisas da zona leonesa, feitas por Espinosa con Rodríguez-Castellano e Espinosa con Otero; as da zona castelá, realizadas por Navarro con Espinosa, Espinosa con Rodríguez-Castellano, Espinosa con Otero, e Sanchis Guarner con Rodríguez-Castellano; e as da zona galega, case todas asinadas por Otero con algunha colaboración de Espinosa. Naquel momento, as enquisas do catalán, a cargo de Sanchis Guarner e Moll, estaban moi avanzadas e, na zona portuguesa, o equipo de Otero e Gusmão acababa de empezar os traballos.
Segundo a Introducción do ALPI, en 1947 Sanchis Guarner e Moll acabaron as enquisas da zona catalá e Rodríguez-Castellano, as de Asturias; e no verán de 1952 Sanchis Guarner e Moll fixeron as enquisas do Rosellón. Máis lles custou facer a Luìs F. Lindley Cintra e a Aníbal Otero, entre 1953 e 1954, as enquisas portuguesas pendentes, que non se remataron ata 1956.
Máis información sobre os enquisadores na lapela Fotografías dos enquisadores
Mapa que mostra os lugares investigados polos enquisadores
